*ကျွန်တော်နှင့်တစ်ရာ့လေးဆယ်လေးမိနစ်*

*ကျွန်တော်နှင့်တစ်ရာ့လေးဆယ်လေးမိနစ်*



တစ်ယောက်တည်း ဆိုတာ
ကျနော်တစ်ယောက် ကြိုးပြတ်လဲပြိုဖို့
တဲတဲလေးပဲ လိုတော့တယ်လို့လည်း
ပြောလို့ရနိုင်တယ်မသက်ဝေ။
အဲဒီလိုပဲ . . . .
ကျနော်တစ်ယောက် ကွဲပွင့်ပေါက်ကျဲဖို့

ချုပ်တည်းနေရတယ်လို့လည်း
အဓိပ္ပာယ် ရလိမ့်မယ် ။
ကျနော် သတ္ထုနတ်ဘုရားတွေကို မုန်းတယ်
သူတို့ဆီမှာ နှလုံးသားတစ်ခုကို ယဇ်ပူဇော်ရန်
တစ်ရာ့လေးဆယ့်လေးမိနစ် အလိုမှာ . . .
သူတို့ဟာ မီးတောက်နေတဲ့အတောင်ပံတွေ တဖြန်းဖြန်းခတ်
ငတ်မွတ်ဆာလောင်စွာ ၀မ်းဗိုက်ကိုဖွင့်လို့ စောင့်နေကြပြီ။
ကျနော် အိပ်မက်တွေမက်တယ် မသက်ဝေ
အိပ်မက်ထဲမှာ အိပ်မက်ကိုပြန်မက်နေတယ်

ကျနော်လေ လမ်းအကြီးကြီးကို ဖိနပ်အကြီးကြီးနဲ့ လျှောက်နေရသလိုပဲ

အဲဒီနေ့မှာ နှင်းတွေကျနေမလားမသက်ဝေ
အဲဒီနေ့မှာ မြူတွေပဲ ကျနေမလား
ဘာပဲဆိုဆို မှုန်ဝါးနေမှာပဲနော်
ကျနော် မမြင်ရခင်က ကြိုပြီးကြည့်နေလိုက်တာ
တဖြည်းဖြည်းနဲ့ ပိုပိုဝေးလာသလိုပါပဲ။
မောတယ် မသက်ဝေရယ်
အသက်ရှူရတာလည်း မောတယ်

မသက်ဝေရဲ့နာမည်လေးကို ရွတ်ရတာလည်း မောတယ်
ဆုတွေ တောင်းရတာလည်း မောတယ်
အဲဒီလို မောမောပန်းပန်းနဲ့ မသက်ဝေကို ကျနော်လွမ်းတယ်
ရိုးရိုးရှင်းရှင်းပါပဲ မသက်ဝေ. . . .
မသက်ဝေကို ကျနော်လွမ်းတယ် ။

ကဲ အချိန်စေ့ပြီမသက်ဝေ
ဗုံသံတွေ လည်းကွဲလွင့်ပြန့်ပြိုလို့
ကျနော်တို့ ဝေး ကြ စို့ နော် ။

ကိုအမည်မဲ့၏ခေါင်းစဉ်အား ခွင့်တောင်းရေးသားပါသည်